Soomaaliya ko ku biirtay Bandhiga Ganacsiga EAC ee Nairobi

Kenya, 9 Novermber 2025 - Siddeed iyo labaatan ganacsade oo Soomaali ah ayaa ka qaybgalaya Bandhigga 25-aad ee Ganacsiyada Yaryar iyo Dhexdhexaad (MSME) ee Bulshada Bariga Afrika, kaasoo ka socda Nairobi, Kenya, intii u dhaxaysay 7 ilaa 16 Nofeembar 2025. Ganacsatadan ayaa soo bandhigaya hal-abuuro cusub oo dhinaca teknolojiyadda iyo ganacsiga beeraha, iyagoo matalaya Soomaaliya markii ugu horreysay.

Ka qaybgalka ganacsatada Soomaaliyeed waxaa taageero siinaya Midowga Yurub, gaar ahaan hindisaha Global Gateway sida uu ku sheegay Midowga bartiisa X, si loo xoojiyo soo bandhigidda alaabooyinka iyo adeegyada cusub ee Soomaaliya. Bandhiggan ayaa fursad u siinaya ganacsatada Soomaaliyeed in ay la wadaagaan khibradooda, la sameeyaan iskaashi, isla markaana ka faa’iidaystaan suuqyada gobolka.

Bandhiggan ganacsiga waxaa ka qaybgalaya in ka badan 3,000 ka qaybgaleyaal ah oo ka socda dalalka xubnaha ka ah Bulshada Dhaqaalaha Bariga Afrika (EAC). Waxaa la soo bandhigi doonaa hal-abuuro, alaabooyin, iyo adeegyo ku saabsan qaybaha beeraha, warshadaha, iyo ganacsiga guud, iyada oo lagu xoojinayo suuqgeynta iyo kobcinta ganacsiyada yaryar iyo kuwa dhexdhexaad ah ee gobolka.

Bandhigaan Ganacsiga ee Bulshada Bariga Afrika waa dhacdo sanadle ah oo ay abaabulaan Xoghaynta Ururka oo ay kaashanayaan dowladaha xubnaha ka ah iyo ururada wada-shaqeynta la leh, si loo soo bandhigo loona taageero ganacsiyada yaryar, kuwa dhexe iyo kuwa micro ee gobolka.Waxaa markii ugu horreysay lagu qabtay Arusha sanadkii 1999, tan iyo markaasna waxaa si isdaba joog ah loogu qabtaa wadamada xubnaha ka ah EAC iyadoo loo kala wareejinayo sannad walba.