Muqdisho (Dawan) – Guddiga Madax-bannaan ee Doorashooyinka Qaranka iyo Soohdimaha (NIEBC) ayaa maanta si rasmi ah u shaaciyay in doorashada Madaxweynaha Soomaaliya ay dhici doonto 15-ka May 2027, halka doorashada labada aqal ee Baarlamaanka la qaban doono 15-ka Abriil 2027. Doorashooyinkan ayaa la qorsheeyay in lagu qabto nidaamka qof iyo cod.
Guddiga ayaa sidoo kale soo saaray jadwalka hawlaha doorashada, kaas oo dhigaya in dib loo furi doono diiwaangelinta ururrada siyaasadda iyo codbixiyeyaasha muddada u dhexeysa 1-da iyo 22-ka Nofeembar 2026. Sidoo kale, liisaska musharraxiinta Baarlamaanka waa in la soo gudbiyaa ugu dambayn 22-ka Nofeembar 2026, halka ololaha doorashadu uu bilaaban doono 27-ka Febraayo 2027.
Shaacinta jadwalkan ayaa ku soo beegmaysa xilli mucaaradku ay ka soo horjeedaan hannaanka doorashada ee dowladda, iyadoo wada-hadallo dhowr ah oo dhexmaray dowladda iyo mucaaradka aysan weli ka soo bixin heshiis ku saabsan arrimaha doorashada.
