Muqdisho (Dawan)- Kumannaan arday oo Soomaaliyeed ayaa maanta u fariistay imtixaanka shahaadiga ah ee fasalka 12-aad ee dugsiyada sare, iyadoo sanadkan ay muuqato ballaarin cusub oo lagu sameeyay goobaha lagu galayo imtixaanka, iyo sidoo kale koror la taaban karo oo ku yimid tirada ardayda ka qeybgaleysa.
Wasaaradda Waxbarashada Soomaaliya ayaa sheegtay in imtixaanka sanadkan lagu qabanayo 58 degmo iyo 158 xarumood oo ku kala yaalla gobollada dalka, waxaana u fariistay 44,136 arday.
Sanadkan waxaa sidoo kale markii ugu horreysay imtixaanka lagu qabtay deegaano aan hore loogu qaadi jirin, kuwaas oo ay ka mid yihiin Ceelasha Biyaha ee gobolka Shabeellaha Hoose iyo Godinlabe oo ka tirsan gobolka Galgaduud.
Ardayda ku nool Ceelasha Biyaha ayaa sanadihii hore ku geli jiray degmada Afgooye si ay u galaan imtixaanka, halka ardayda Godinlabe ay u aadi jireen degmada Cadaado. Balse sanadkan, labada deegaanba waxay heleen xarumo rasmi ah oo lagu qaado imtixaanka dugsiga sare.
Mas’uuliyiinta waxbarashada ayaa sheegay in tallaabadan ay qeyb ka tahay dadaallada lagu ballaarinayo adeegyada waxbarashada, si ardayda Soomaaliyeed meel kasta oo ay joogaan ay u helaan fursad siman oo waxbarasho iyo imtixaan qaran.
Wasiiru-dowlaha Wasaaradda Waxbarashada Soomaaliya, Nuura Mustafa, ayaa sheegtay in tirada ardayda sanadkan ay gaartay 44,136 arday.
“Guud ahaan sanadkan waxaa imtixaanka u fariistay 44,136 arday, waxaana lagu galay 58 degmo iyo 158 xarumood oo ku kala yaalla dalka,” ayay tiri Wasiiru-dowluhu.
