Muqdisho (Dawan) – Dowladda Federaalka Soomaaliya ayaa ku biirtay 15 heshiis, borotokool iyo lifaaqyo sharciyeed oo caalami ah oo la xiriira arrimaha badaha, iyadoo tallaabadan lagu tilmaamay mid lagu casriyeynayo hannaanka sharciyeed ee badaha dalka.
Wasaaradda Dekedaha iyo Gaadiidka Badda ayaa sheegtay in tani ay tahay isbeddelkii ugu ballaarnaa ee lagu sameeyo sharciyada badaha Soomaaliya tan iyo markii ay xornimada qaadatay, isla markaana ay dalka ka caawin doonto inuu la jaanqaado xeerarka caalamiga ah ee khuseeya badqabka maraakiibta, amniga badda, heerarka badmaaxiinta iyo ilaalinta deegaanka badda.
Soomaaliya oo leh xeebta ugu dheer qaaradda Afrika kuna taalla marinno badeed istiraatiiji ah, ayaa wasaaraddu sheegtay in tan iyo sannadkii 1960 ay ku biirtay oo keliya saddex heshiis oo caalami ah oo la xiriira arrimaha badaha, halka hadda la qaaday tallaabo ballaaran oo lagu casriyeynayo nidaamkaas.
Heshiisyada cusub ayaa daboolaya dhinacyo kala duwan oo ay ka mid yihiin baadigoobka iyo samatabbixinta badda, tababarka iyo shahaado-siinta badmaaxiinta, ka hortagga isku-dhacyada maraakiibta, cabbirka culeyska maraakiibta, fududeynta gaadiidka badda, badbaadada nolosha badda, u-diyaargarowga iyo ka jawaabidda wasakhowga shidaalka, magdhowga waxyeellada wasakhowga, ka hortagga wasakhowga maraakiibta, amniga badda iyo ka saarista burburka maraakiibta.
