Maqaalka waa la soo dejinayaa...
Wasaaradda Arrimaha Dibadda ayaa ku tilmaantay wararka kuwo “been abuur ah” oo aan sal lahayn
Muqdisho (Dawan) – Dowladda Federaalka Soomaaliya ayaa si adag u beenisay wararka sheegaya in safiirka Imaaraadka Carabta laga eryay Muqdisho, iyadoo ku tilmaantay eedeymahaas kuwo “aan sal lahayn” oo lagu faafiyay warbaahinta iyo baraha bulshada.
Wasaaradda Arrimaha Dibadda iyo Iskaashiga Caalamiga ayaa bayaan ay soo saartay maanta oo Talaado ah ku sheegtay inay “walaac xooggan” ka qabto wararkaasi, kuwaas oo ay tilmaantay inay yihiin kuwo been abuur ah oo aan ka iman ilo rasmi ah.
“Wasaaraddu si cad ayay u diidaysaa wararkan, waxayna ugu baaqaysaa hay’adaha warbaahinta iyo isticmaalayaasha baraha bulshada inay muujiyaan xirfad iyo mas’uuliyad, isla markaana ay ku tiirsanaadaan ilo rasmi ah,” ayaa lagu yiri bayaanka.
Wasaaraddu waxay sidoo kale ka digtay faafinta xog aan la xaqiijin oo wax u dhimi karta xiriirka diblomaasiyadeed ee u dhexeeya Soomaaliya iyo dalalka Carabta.
