Beijing (Dawan) – Wasiirka Warfaafinta, Dhaqanka iyo Dalxiiska Xukuumadda Federaalka Soomaaliya, Cabdulfataax Qaasim Maxamuud, ayaa khudbad ka jeediyay Madasha 7-aad ee Iskaashiga Warbaahinta Afrika iyo Shiinaha oo ka socota magaalada Beijing, isagoo soo bandhigay dadaallada Soomaaliya ee horumarinta iyo casriyeynta warbaahinta, sida ay sheegtay Wasaaradda Warfaafinta Soomaaliya.
Wasiirka ayaa madasha kaga hadlay horumarka Soomaaliya ka sameyneyso dhinaca casriyeynta warbaahinta, isagoo xusay muhiimadda ay leedahay la qabsiga isbeddellada tiknoolajiyadda iyo adeegsiga aaladaha cusub sida garaadka macmalka ah (AI) ee warbaahinta.
Cabdulfataax Qaasim ayaa sheegay in Soomaaliya ay ka shaqeyneyso dhismaha warbaahin casri ah oo la jaanqaadi karta horumarka caalamiga ah, isla markaana awood u leh gudbinta xog sugan, horumarinta bulshada iyo xoojinta xiriirka bulshada.
