Muqdisho (Dawan)– Wasaaradda Caafimaadka iyo Daryeelka Bulshada ee Dowladda Federaalka Soomaaliya ayaa Axaddii daahfurtay wadatashiyo lagu diyaarinayo Istaraatiijiyadda Qaran ee Tallaalka, iyadoo ay ka qeyb galayaan mas'uuliyiin caafimaad oo heer federaal iyo dowlad-goboleed ah, hay'ado caalami ah iyo daneeyayaal kale oo ujeeddadoodu tahay xoojinta barnaamijka tallaalka dalka.
Kulankan oo soconaya muddo saddex maalmood ah ayaa waxaa qabanqaabinaya Wasaaradda Caafimaadka iyo Daryeelka Bulshada, waxaana lagu dejinayaa qorshe-hawleed lagu ballaarinayo helitaanka adeegyada tallaalka iyo kor u qaadidda heerka daboolidda tallaalka guud ahaan Soomaaliya.
Shirkan waxaa ka qeyb galaya wakiillo ka socda Wasaaradda Caafimaadka Federaalka, wasaaradaha caafimaadka dowlad-goboleedyada, Ururka Caafimaadka Adduunka (WHO), Sanduuqa Qaramada Midoobay ee Carruurta (UNICEF), International Rescue Committee (IRC), Save the Children, adeeg-bixiyeyaasha caafimaadka ee gaarka loo leeyahay iyo jaamacado.
Furitaanka wadatashiga ayaa Agaasimaha Guud ee Wasaaradda Caafimaadka, Dr. Yuusuf Xasan Ibraahim (Isack), sheegay in istaraatiijiyadda cusub ay noqon doonto tiir muhiim u ah dadaallada dowladda ee lagu xoojinayo daryeelka caafimaadka aasaasiga ah iyo tayeynta adeegyada tallaalka dalka oo dhan.
Wuxuu sidoo kale iftiimiyay horumarka uu sameeyay Barnaamijka Qaran ee Tallaalka Soomaaliya, isagoo xusay dib-u-habeynno la hirgeliyay sannadkii la soo dhaafay oo lagu xoojiyay isku-duwidda iyo kormeerka barnaamijka.
