Muqdisho (Dawan) – Dowladda Federaalka Soomaaliya ayaa qaaday tallaabo cusub oo lagu hirgelinayo Waddada istiraatiijiga ah ee Gaalkacyo–Hobyo, kaddib markii Wasaaradda Hawlaha Guud, Dib-u-dhiska iyo Guriyeynta ay saxiixday qandaraas lagu bilaabayo daraasadaha farsamo iyo naqshadeynta wejiga koowaad ee mashruuca.
Qandaraaska ayaa diiradda saaraya qaybta Gaalkacyo Ceelguula oo dhererkeedu yahay 100 kiiloomitir, waxaana ka mid ah daraasad suurtagalnimo, naqshadeyn hordhac ah iyo mid faahfaahsan, qiimeynta saameynta deegaanka iyo bulshada, iyo diyaarinta dukumentiyada qandaraas-bixinta ee mashruuca.
Munaasabadda saxiixa ayaa lagu qabtay xarunta Wasaaradda Hawlaha Guud ee magaalada Muqdisho, waxaana shir-guddoominayay Wasiirka Hawlaha Guud, Dib-u-dhiska iyo Guriyeynta, Ayuub Ismaciil Yuusuf.
Wasaaradda ayaa sheegtay in shirkadda KKATT Consult Limited loo xilsaaray fulinta daraasaadka farsamo iyo naqshadeynta qaybta Gaalkacyo–Ceelguula.
Sida ku cad dukumentiyada Bangiga Horumarinta Afrika (AfDB), Waddada Galkacyo–Hobyo ayaa dhererkeedu yahay 241 kiiloomitir, waxayna isku xiraysaa magaalada Gaalkacyo iyo dekedda Hobyo ee xeebta Badweynta Hindiya. Qaybta hadda la daraasaynayo oo ah Gaalkacyo–Ceelguula ayaa dhererkeedu yahay 100 kiiloomitir, waxaana loo qorsheeyay in loo dhiso waddo carro-adag ah oo la isku cadaadiyay.
Mashruucan wuxuu qayb ka yahay Barnaamijka Horumarinta Kaabeyaasha Waddooyinka Soomaaliya (RIPSOM), kaas oo ujeeddadiisu tahay horumarinta isku xirka waddooyinka dalka iyo fududeynta isu-socodka dadka iyo badeecadaha iyadoo la helayo gaadiid lagu kalsoonaan karo oo kharashkiisu hooseeyo.