Soomaaliya (Dawan) – Soomaaliya ayaa bilowday wejiga koowaad ee Mashruuca Bulsho, kaas oo lagu qiimeeyay $35 milyan, isla markaana qayb ka ah dadaallada lagu xoojinayo maamullada maxalliga ah iyo bixinta adeegyada dadweynaha, sida uu sheegay Wasiirka Maaliyadda.
Wasiirka Maaliyadda Biixi Imaan Cige ayaa sheegay in barnaamijkan uu socon doono muddo shan sano ah, laga bilaabo 2025 illaa 2029, waxaana lagu maalgelinayaa kaalmo ka timid Ururka Horumarinta Caalamiga ah ee Bangiga Adduunka (IDA) iyo Sanduuqa Kalsoonida ee Saaxiibada Badan (MPTF).
“Mashruucan wuxuu soo maray geeddi-socod dheer oo ay ku jiraan wadatashiyo lala yeeshay bulshada, dowlad-goboleedyada iyo degmooyinka, iyo sidoo kale isku-duwid dhexmartay hay’adaha dowladda,” ayuu yiri Cige xilli uu ka hadlayay munaasabadda daahfurka oo maanta oo Isniin ah ka dhacday Muqdisho.
