Nairobi (Dawan) – Soomaaliya ayaa mar kale taageertay dib-u-habeynta Golaha Ammaanka ee Qaramada Midoobay, iyadoo sheegtay in la joogo waqtigii hay’adda ugu awoodda badan Qaramada Midoobay ay ka tarjumi lahayd miisaanka siyaasadeed, tirada dadka iyo doorka Afrika ee arrimaha nabadda iyo amniga caalamka.
Mowqifka Soomaaliya ayaa lagu muujiyay kulan heer wasiir ah oo looga hadlayay dib-u-habeynta Golaha Ammaanka iyo isticmaalka awoodda diidmada qayaxan ee Veto-ga, kaas oo ka dhex dhacay magaalada Nairobi, inti uu socday Shir Madaxeedka Africa Forward Summit.
Wasiirka Arrimaha Dibadda iyo Iskaashiga Caalamiga ah ee Soomaaliya, Cabdisalaam Cabdi Cali, ayaa kulanka ka qeyb galay, waxaana wehliyay Safiirka Soomaaliya ee Kenya, Jibriil Ibraahim Cabdulle, iyo diblomaasiyiin sare oo ka tirsan Dowladda Federaalka Soomaaliya.
Dowladda Soomaaliya ayaa kulanka ka caddeysay inay taageersan tahay dib-u-habeyn lagu sameeyo Golaha Ammaanka, si loo helo matalaad juqraafiyeed oo caddaalad ah lana xoojiyo codka dalalka soo koraya, gaar ahaan kuwa Afrika.
Doodda Soomaaliya ayaa qeyb ka ah mowqifka guud ee qaaradda Afrika, oo muddo dheer ku doodeysay in qaab-dhismeedka Golaha Ammaanka uusan ka tarjumayn xaqiiqada siyaasadeed ee dunida casriga ah. Afrika, oo ay ku nool yihiin in ka badan hal bilyan oo qof, isla markaana si joogto ah uga mid ah meelaha ay saameeyaan go’aamada Golaha Ammaanka, ayaan weli lahayn kursi joogto ah oo leh awood buuxda.
