Maqaalka waa la soo dejinayaa...
Soomaaliya ayaa cambaareysay isku-daygii weerar oo loo adeegsaday diyaarad aan duuliya lahayn oo lagu beegsaday magaalada barakeysan ee Maka, iyadoo muujisay taageeradeeda Boqortooyada Sacuudiga
Muqdisho (Dawan) – Dowladda Federaalka Soomaaliya ayaa si adag u cambaareysay isku-daygii weerar ee loo adeegsaday diyaarad aan duuloya lahayn oo lagu qaaday magaalada barakeysan ee Maka, taas oo ay Ciidamada Difaaca Cirka Boqortooyada Sacuudiga ka hortageen ka hor inta aysan gaarin magaalada, sida ay sheegtay Wasaaradda Arrimaha Dibadda Soomaaliya.
Dowladda Soomaaliya ayaa sidoo kale cambaareysay weerarradii dhowaan lagu qaaday goobaha rayidka ah ee Boqortooyada Sacuudiga.
Wasaaradda Arrimaha Dibadda Soomaaliya ayaa sheegtay in Soomaaliya ay garab taagan tahay Boqortooyada Sacuudiga, iyadoo muujisay taageeradeeda ku aaddan xaqa ay u leedahay ilaalinta dhulkeeda, shacabka iyo goobaha barakeysan ee Islaamka.
Soomaaliya ayaa mar kale xaqiijisay xiriirka dhow iyo iskaashiga ay la leedahay Boqortooyada Sacuudiga, iyadoo ku celisay muhiimadda ilaalinta amniga iyo xasilloonida gobolka.
