Soomaaliya oo cambaareysay weerar lagu dilay dad badan oo ka dhacay Nigeria

Soomaaliya, 23 Febraayo 2026 (Dawan)– Dowladda Federaalka Soomaaliya ayaa maanta oo Isniin ah si adag u cambaareysay weerarkii dhowaan ka dhacay gobolka Zamfara ee dalka Nigeria, kaas oo lagu dilay in ka badan 50 qof oo rayid ah, laguna afduubay haween iyo carruur.

Wasaaradda Arrimaha Dibadda Soomaaliya ayaa muujisay “garab istaagga ay u hayaan Dowladda iyo shacabka Jamhuuriyadda Federaalka Nigeria,” waxayna ku baaqday “sii deynta degdegga ah ee aan shuruud ku xirnayn” ee dhammaan dadka la haysto.

“Afrika waa inay u midowdaa ka hortagga argagixisada iyo ilaalinta dadka rayidka ah,” ayay wasaaraddu ku tiri bayaan ay soo saartay.

Weerarka, oo ka dhacay waqooyiga-galbeed ee Nigeria, ayaa qayb ka ah mowjado rabshado ah oo ay geysanayaan kooxo hubeysan—oo inta badan dadka deegaanka u yaqaanaan burcad—kuwaas oo kordhiyey weerarrada ay ku hayaan bulshooyinka miyiga ah sannadihii u dambeeyey.

Sida ay sheegeen mas’uuliyiinta iyo dadka deegaanka, dabley ku socotay mootooyin ayaa gudaha u galay tuulooyinka, iyagoo toogtay dadka deegaanka isla markaana gubay guryahooda.

Ciidamada ammaanka ee Nigeria ayaa ku dhib wayn ku qaba xakameeynta amni darrada ka jirta waqooyiga-galbeed, halkaas oo ka jiraan kooxo hubeysan oo geysta falal kala duwan oo ka dhan ah dadka rayidka iyo ciidmada dowladda .