Soomaaliya oo Daahfurtay Istaraatijiyadda Qaranka ee Talaabooyinka Hore

Soomaaliya, 18 November 2025 – Hay’adda Maareynta Masiibooyinka Qaranka (SoDMA) ayaa Isniintii magaalada Muqdisho kusoo xirtay shir heer qaran ah oo socday saddex maalmood, kaas oo lagu ansixiyay Istaraatijiyadda Qaranka ee Tallaabooyinka Hore ee La Qaado Marka La Saadaaliyo Masiibo (Anticipatory Action) — qorshe hagaya sida Soomaaliya u saadaalin karto aafooyinka iyo sida ay u qaadi karto tallaabooyin degdeg ah oo badbaadinaya nolosha shacabka.

Agaasimaha Maareynta Khatarta Masiibooyinka ee SODMA Khadar Sheekh Maxamed, oo ka hadlay xiritaanka shirka, ayaa sheegay in istaraatijiyadda ay ka dhalay sanado wadatashi, falanqeyn qoto dheer, iyo dib-u-eegis farsamo oo ay si wadajir ah u sameeyeen SoDMA, IGAD, hay’adaha Qaramada Midoobay, iyo wasaaradaha dowladda.

“Khariidaddu waa mid ka tarjumaysa shaqo adag, iskaashi ballaaran, iyo hannaanka ay dowladdu si dhow ula socotay,” ayuu yiri Agaasime Khadar. “Bah-wadaagteenna ayaa suurta geliyay in maanta Soomaaliya hesho qorshe mideysan oo ku saabsan tallaabooyinka hore ee masiibooyinka.”

Istaraatijiyaddu waxay xoogga saareysaa:

In la diyaariyo nidaam saadaalin hore oo isku xiraya hay’adaha dowladda
In la dardargeliyo tallaabooyinka degdegga ah marka digniinaha early-warning-ka soo baxaan
In la kordhiyo awoodda bulshada ee u adkeysiga masiibooyinka
In la mideeyo xogaha saadaasha, falanqaynta, iyo jawaab-celinta

Mas’uuliyiin ka socday DRC, FAO, WFP, iyo IGAD ayaa sheegay in istaraatijiyaddan ay Soomaaliya ka caawin doonto in masiibooyinka looga falceliyo si ka habboon sidii hore, lagana hortago khasaaraha soo noqnoqda ee ku dhaca bulshada.

Hay’adahaan ayaa balan qaaday in ay sii wadi doonaan taageerada farsamo iyo tan dhaqaale ee lagu xoojinayo nidaamka anticipatory action ee dalka.

Guddoomiyaha SoDMA, Maxamuud Macalin Cabdulle, oo si rasmi ah u soo xiray shirka, ayaa sheegay in istaraatijiyaddan cusub ay Soomaaliya u horseedi doonto diyaargarow dhab ah, jawaab-celin isku dhafan, iyo awood ay bulshada u hesho inay ka fogaato xasaradaha ka dhasha masiibooyinka.

Khariidaddu waxaa lagu fulinayaa mashruuca SCALAA, oo ay maalgeliso DG ECHO, halka WFP, FAO, IFRC, DRC, iyo ICPAC ay hoggaamiyaan dhaqangelinteeda. Mashruucan ayaa diiradda saara isku xirka saadaasha cimilada, digniinta hore, iyo tallaabooyinka degdegga ah ee lagu yareynayo khasaaraha.