Soomaaliya oo daahfurtay Machadkii ugu horreeyay ee Culuumta Badda

Muqdisho (Dawan) – Dowladda Federaalka Soomaaliya ayaa si rasmi ah magaalada Muqdisho uga daahfurtay Machadka Culuumta Badda Soomaaliyeed, kaas oo noqonaya kii ugu horreeyay ee dalka laga hirgeliyo si loo kobciyo aqoonta la xiriirta badaha iyo ka faa’iideysiga kheyraadka badda Soomaaliya.

Machadkan cusub oo ay daahfurtay Wasaaradda Gaadiidka iyo Dekedaha Soomaaliya ayaa lagu baran doonaa culuumta badda, iyadoo ujeeddadu tahay in la diyaariyo jiil Soomaaliyeed oo aqoon durugsan u leh maamulka, isticmaalka iyo horumarinta dhaqaalaha ka yimaada badda.

Wasiirka Gaadiidka iyo Dekedaha Soomaaliya, Cabdiqaadir Maxamed Nuur ayaa sheegay in dowladda ay qorsheyneyso in machadkan laga dhigo mid shahaadooyinkiisa laga aqoonsado heer caalami.

“Waxaan rajeynayaa in culuumta halkan lagu barto iyo shahaadooyinkooda laga aqoonsan doono jaamacadaha iyo macaahidda kale ee culuumta badda. Sidoo kale, waxaan rajeynayaa in buugga badmaaxaha Soomaaliyeed laga aqoonsan doono dalal badan oo caalamka ah,” ayuu yiri Wasiirka Gaadiidka iyo Dekedaha.

Dhanka kale, Wasaaradda Waxbarashada iyo Wasaaradda Gaadiidka ayaa ballanqaaday in machadku heli doono xarun rasmi ah oo u gaar ah, si loogu tababaro kaadiriin ku xeel dheer culuumta badda.

“Machadku wuxuu heli doonaa xarun rasmi ah oo lagu soo saaro kaadiriin ku takhasusay cilmiga badaha Soomaaliya,” ayay sheegeen masuuliyiintu.

Masuuliyiinta ayaa sidoo kale tilmaamay in baahida loo qabo khubarada culuumta badda ay sii kordheyso, xilli ay kor u kacayaan maraakiibta sida rasmiga ah u qaadata calanka Soomaaliya, kuwaas oo hadda gaaraya 10 markab, sida ay sheegtay Wasaaradda Gaadiidka iyo Dekedaha.

Machadka cusub ayaa noqonaya kan keliya ee dalka laga helo ee lagu barto culuumta badda, arrintaas oo muujinaysa sida aqoonta ku saabsan badaha ay muddo dheer ugu yaraatay gudaha Soomaaliya.

“Waxaan aad uga xumahay in dalka aysan ka jirin machadyo badan oo sidan oo kale ah. Waxaa habboonaan lahayd inaan maanta haysanno tobannaan machad oo lagu barto culuumta badda, balse tani waa bilow wanaagsan,” ayuu yiri wasiirku raaciyay hadalkiisa.

Wasiirka ayaa sidoo kale xusay in shaqaalaha Wasaaradda iyo hay’adaha la shaqeeya looga baahan doono aqoon la xiriirta arrimaha badda, isagoo caddeeyay in qof aan lahayn aqoon ku saabsan culuumta badda ama aan wax ka baran Machadka Culuumta Badda Soomaaliyeed uusan sii mid ahaan doonin Wasaaradda Gaadiidka iyo Dekedaha.

Machadka Culuumta Badda Soomaaliyeed ayaa la sheegay inuu u furan yahay dhammaan dadka daneynaya ee ku nool guud ahaan maamul-goboleedyada dalka, taas oo fursad siin karta dhalinyaro badan inay ka qeyb qaataan horumarinta dhaqaalaha badda iyo ka faa’iideysiga kheyraadka dabiiciga ah ee Soomaaliya.