Muqdisho (Dawan)– Dowladda Federaalka Soomaaliya ayaa Sabtidii si rasmi ah u daahfurtay xeerarka lagu maamulayo suuq-geynta beddelka caanaha naaska, xilli la furayay Toddobaadka Caalamiga ah ee Naas-nuujinta, iyadoo Dowladda iyo hay'adaha Qaramada Midoobay ay sheegeen in tallaabadan ay qeyb ka tahay dadaallada lagu xoojinayo naas-nuujinta iyo caafimaadka carruurta.
Xeerarkan ayaa waxaa si wadajir ah u saxiixay oo u daahfuray Wasaaradda Caafimaadka iyo Daryeelka Bulshada, Hay'adda Carruurta ee Qaramada Midoobay (UNICEF), Hay'adda Caafimaadka Adduunka (WHO) iyo hay'ado kale oo iskaashi la leh dowladda, sida lagu sheegay war-saxaafadeed ay si wadajir ah u soo saareen.
War-saxaafadeedka ayaa lagu sheegay in xeerarka cusub ay waafaqsan yihiin heerarka caalamiga ah iyo ballanqaadyada qaran, isla markaana looga gol leeyahay ilaalinta, dhiirrigelinta iyo taageeridda naas-nuujinta, iyadoo la xaddidayo suuq-geynta aan habboonayn ee beddelka caanaha naaska si qoysasku u gaaraan go'aanno xog-ogaal ah oo ku saabsan quudinta carruurta.
Daahfurka xeerarkan ayaa kusoo beegmay iyadoo Soomaaliya ay ka qayb galayso Toddobaadka Caalamiga ah ee Naas-nuujinta oo sanadkan halku-dhiggiisu yahay "Naas-nuujinta: Bilow Waara oo Nololeed – Xooji Waxa Shaqeeya."
War-saxaafadeedka ayaa sidoo kale xusay in inkastoo qiyaastii 60% carruurta Soomaaliya lagu bilaabo naas-nuujinta saacadda ugu horreysa dhalashada, haddana 34% oo keliya carruurta ka yar lix bilood ay si gaar ah u helaan caanaha naaska, halka heerka naas-nuujintu uu hoos ugu dhaco 49% marka ilmuhu gaaro hal sano iyo 40% marka uu gaaro laba sano.
