Soomaaliya oo dardar gelineysa qorshaha kahortagga Ebola

Muqdisho (Dawan) — Waxaa maanta oo Isniin ah si rasmi ah uga furmay Xarunta Qaran ee Howl-gallada Degdegga ah ee Caafimaadka Dadweynaha ee Soomaaliya kulan looga hadlayo qorshaha ka hortagga cudurka Ebola, kaas oo looga golleeyahay in lagu xoojiyo iskaashiga hay’adaha dowladda ee la xiriira caafimaadka iyo badbaadada dalka ee cudurkan halista ah.

Kulankan waxaa ka qeyb galay xubno ka socday Wasaaradda Amniga Gudaha, Wasaaradda Arrimaha Dibadda, Wasaaradda Caafimaadka, Wasaaradda Duulista Hawada, Wasaaradda Warfaafinta, Maareeyaha Guud ee Duulista Hawada, iyo Guddoomiyaha Hay’adda Maareynta Musiibooyinka Qaranka. Kulanka ayaa diiradda lagu saaray sidii loo horumarin lahaa qorshayaasha ka hortagga iyo cudurka Ebola, iyo sidii loo adkeyn lahaa nidaamka wada shaqeyneed ee hay’adahaasi.

Dowladda ayaa hore u sheegtay in Soomaaliya ay si firfircoon u kordhinayso awooddeeda ka hortagga Ebola ka hor inta aanu cudurku soo gaarin dalka, iyadoo xoogga la saarayo meelaha laga filan karo in cudurku ka soo galo, sida garoomada diyaaradaha, dekedaha iyo xuduudaha dhulka. Waxaa sidoo kale la sheegay in la diyaariyay kooxo caafimaad oo xirfad leh, qalabka baaritaanka, sheybaarrada caafimaadka, iyo nidaam lagu ogaanayo cudurrada ka hor inta aysan ku faafin bulshada.

Kulankan ayaa qayb ka ah dadaallada ballaaran ee dowladda Soomaaliya ay ku dooneyso inay uga hortagto khataraha cudurrada faafa ee gobolka, gaar ahaan xilligan ay ka jiraan xaalado caafimaad oo daran dalalka deriska ah sida Democratic Republic of the Congo iyo Uganda, iyadoo ay la shaqeynayaan hay’ado caalami ah sida Ururka caafimaadka Adduunka kuwaas oo ka qeyb qaadanaya talo-bixinta iyo kormeerka nidaamyada ka hortagga.