Muqdisho (Dawan) – Dowladda Soomaaliya ayaa dhiseysa xarunta Halmeel, oo noqon doonta meel mideysa adeegyada dowladda, si muwaadiniintu uga helaan adeegyo kala duwan hal goob.
Golaha Wasiirrada Xukuumadda Jamhuuriyadda Federaalka Soomaaliya ayaa maanta ansixiyay dhismaha Xarunta Adeegga Mideysan ee Halmeel, taas oo hoos iman doonta Xafiiska Ra’iisul Wasaaraha, isla markaana loo qorsheeyay inay isku dubbarido oo mideyso adeegyada dadweynaha ee dowladda bixiso.
Xukuumaddu waxay sheegtay in xaruntan cusub ay fududeyn doonto helitaanka adeegyada dowladda, iyadoo yareyn doonta habraacyada adag iyo lakabyada badan ee xafiisyada, kuwaas oo inta badan caqabad ku noqda muwaadiniinta.