Muqdisho (Dawan) – Dowladda Federaalka Soomaaliya ayaa dib u eegaysa sharciga taraafikada iyadoo la doonayo in la yareeyo shilalka waddooyinka lana hagaajiyo nidaamka gaadiidka, sida ay sheegtay Wasaaradda Gaadiidka iyo Duulista Hawada.
Wasaaradda ayaa qabatay kulan wadatashi ah oo ka dhacay Muqdisho, kaas oo lagu falanqeeyay badbaadada waddooyinka iyo maareynta saxmada, iyadoo ay ka qeyb galeen mas’uuliyiin ka kala socday hay’adaha dowladda iyo daneeyayaasha kale.
Agaasimaha Guud ee wasaaradda, Cumar Cali Afrax, ayaa furay kulanka, kaas oo ay ka soo qeyb galeen wakiillo ka socday wasaaradaha caafimaadka, howlaha guud, amniga gudaha iyo arrimaha gudaha, iyo sidoo kale hay’adaha taraafikada iyo qeybta gaarka loo leeyahay.
Sida lagu sheegay bayaan, kulanka ayaa lagu soo bandhigay wax-ka-beddello lagu sameynayo sharciga waddo marista, si loo helo nidaam casri ah oo la jaanqaadaya baahiyaha hadda jira.
