Muqdisho (Dawan) – Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa sheegay in dowladda federaalka ay dib u eegis ku sameynayso siyaasaddeeda ku aaddan Somaliland, isagoo xusay in ujeeddadu tahay in la helo hannaan cusub oo lagu xoojin karo dadaallada dib loogu mideynayo shacabka Soomaaliyeed.
Madaxweynaha ayaa hadalkan ka jeediyay munaasabaddii xuska 26-ka Juun ee xalay lagu qabtay xarunta maamulka Gobolka Banaadir, halkaas oo uu ku sheegay in dib u eegista siyaasadda ay salka ku hayso sidii loo heli lahaa aragti iyo hab cusub oo qancin kara bulshada ku nool gobollada waqooyi.
“Siyaasaddeenna ku saabsan Somaliland iyo gobollada waqooyi dib u eegis ayaan ku sameyneynaa, si aan u helno fikir walaalaheen qancin kara, kuna qancin kara inay walaalahood dib ula midoobaan,” ayuu yiri Madaxweyne Xasan Sheekh Maxamuud.
Madaxweynaha ayaa sheegay in dowladda federaalka ay ka go'an tahay raadinta midnimada Soomaaliyeed, isagoo xusay inay u dulqaadan doonto caqabadaha ka hor imaan kara dadaallada dib u heshiisiinta iyo dib u mideynta dalka.
