Muqdisho (Dawan) – Wasiir Dowlaha Wasaaradda Arrimaha Dibadda iyo Iskaashiga Caalamiga, Cali Cumar, ayaa manata oo Talaado ah difaacay nidaamka eVisa ee Soomaaliya, isagoo ka jawaabaya dhaleeceyn kaga timid Nuuradiin Aadan Diiriye oo ah musharrax Madaxweyne, ka dib xayiraado dhowaan Midowga Yurub uu ku soo rogay muwaadiniinta Soomaaliyeed.
Cali Cumar ayaa sheegay in tallaabooyinka Midowga Yurub—oo adkeeyay helitaanka fiisaha muddada gaaban ee muwaadiniinta Soomaaliyeed—ay la xiriiraan siyaasadaha socdaalka iyo dib-u-celinta, oo aysan ahayn go'aan laga gaaray maamulka gudaha ee Soomaaliya.
“In arrintan loo dhigo sidii dhabar-jab ama meel-ka-dhac weyn oo ku yimid hay'adaha dowladda waa mid khaldan, dhibaatana ku ah siyaasadda,” ayuu yiri Cali Cumar qoraal uu ku daabacay baraha bulshada maalintii Talaadada.
Nuuradiin Aadan Diiriye ayaa horay ugu sifeeyay xayiraadaha fiisaha ee Midowga Yurub "meel-ka-dhac weyn oo ku yimid hay'adaha dowladda," isagoo ku dooday inay muujinayso fashilka ku yimid maamulka Soomaaliya.
