Muqdisho (Dawan) – Dowladda Federaalka Soomaaliya ayaa qaaday tallaabo cusub oo lagu xoojinayo awoodda aqooneed iyo farsamo ee shaqaalaha ka howlgeli doona warshadaha shidaalka dalka, kadib markii 11 shaqaale oo ka tirsan Wasaaradda Batroolka iyo Macdanta loo diray dalka Malaysia si ay ugu soo tababartaan howlaha la xiriira qodista iyo soo saarista shidaalka.
Shaqaalahan ayaa laga soo dhex xulay in ka badan 300 oo shaqaale oo ka tirsan wasaaradda, waxaana ay noqonayaan dufcaddii ugu horreysay ee dowladda dibadda ugu dirto tababarro si gaar ah diiradda u saaraya warshadaha shidaalka iyo gaaska.
Guddoomiyaha Hay’adda Batroolka Qaranka Soomaaliya, Cabdulqaadir Aadan Maxamuud, ayaa sheegay in tallaabadan ay qeyb ka tahay qorshe ballaaran oo lagu diyaarinayo khubaro Soomaaliyeed oo awood u leh inay mustaqbalka hoggaamiyaan howlaha la xiriira kheyraadka dabiiciga ah ee dalka.
“Waxaan dalka Malaysia u dirnay dhallinyaro wax ka soo baran doonta shaqooyinka la xiriira shidaal qodista,” ayuu yiri Guddoomiyuhu.
Tababarka ay qaadan doonaan shaqaalahan ayaa diiradda saari doona arrimaha badqabka iyo amniga goobaha shidaalka, maamulka howlaha qodista, iyo habraacyada caalamiga ah ee lagu maareeyo baarista iyo soo saarista shidaalka.