Muqdisho (Dawan)– Wasaaradda Awqaafta iyo Arrimaha Islaamka Soomaaliya ayaa wadatashi ka furtay qabya-qoraalka Xeerka Masaajidda, iyadoo dooneysa in la dejiyo nidaam cad oo lagu maamulo masaajidda dalka.
Agaasimaha Guud ee Wasaaradda, Dr. Cabdinaafac Axmed Cabdullaahi, ayaa khamiistii kulan wadatashi ah ku qabtay xarunta wasaaradda, kaas oo ay ka qayb galeen imaamyada, khudbadleyda iyo maamulayaasha masaajidda.
Kulanka ayaa diiradda lagu saaray qodobbada ku jira qabya-qoraalka xeerka iyo sidii loo heli lahaa talooyin lagu dhammaystiro ka hor inta aan loo gudbin Golaha Wasiirrada si loo ansixiyo, sida ay Wasaaraddu sheegtay.
Dr. Cabdinaafac ayaa sheegay in xeerku muhiim u yahay nidaaminta iyo horumarinta masaajidda, isla markaana uu gacan ka geysan karo xallinta khilaafaadka ka dhex dhaca qaar ka mid ah masaajidda.
Xeerka ayaa sidoo kale lagu doonayaa in lagu qeexo waajibaadka iyo masuuliyadaha dhinacyada kala duwan ee ku lug leh maamulka masaajidda, si loo helo nidaam cad oo lagu wada shaqeeyo.
