Soomaaliya oo fariisatay miiska go’aan-qaadashada amniga Afrika

Soomaaliya, April 7, 2026 (Dawan) — Soomaaliya ayaa si rasmi ah ugu fariisatay kursiga Golaha Nabadda iyo Amniga (PSC) ee Midowga Afrika manata oo Talaado ah iyadoo billowday muddo labo sano ah oo socon doonta 2026–2028, taasoo calaamad u ah markii ugu horreysay ee ay ku biirto hay’adda ugu sarreysa ee qaaradda u qaabilsan xallinta khilaafaadka.

Xafladda rasmiga ah ayaa ka dhacday xaunta Midowga Afrika ee Addis Ababa iyada oo laga taagay calanka Soomaaliya Golaha PSC . Waqtiga Soomaaliya ayaa si rasmi ah u bilaabmay 1-da April 2026, waxaana uu socon doonaa ilaa 31-ka March 2028. Soomaaliya waxay ku biirtay golaha 15-ka xubnood ka kooban, iyadoo ay weheliyaan dalal cusub oo la doortay sida Benin, Gabon, Lesotho, Morocco, iyo South Africa.

Guddoomiyaha Guddiga Midowga Afrika Maxamuud Cali Yuusuf ayaa munaasabadda ka sheegay in xubinnimada PSC ay wadato mas’uuliyad culus oo dalalka laga rabo inay si wadajir ah, go’aan leh, ugu hoggaansamaan mabaadi’da nidaamka Nabadda iyo Amniga Afrika.

Isbeddelkan ayaa ku soo beegmaya xilli Soomaaliya ay ku jirto dib u soo kabasho diblomaasiyadeed oo ballaaran. Dalka ayaa haatan sidoo kale kursi aan joogto ahayn ku leh Golaha Ammaanka ee Qaramada Midoobay muddada 2025–2026, waxaana uu qabtay guddoominta wareegta ah bishii January 2026.

Gudaha dalka, dowladda Soomaaliya waxay waddaa hirgelinta buuxda ee Hawlgalka Taageerada iyo Xasilinta Midowga Afrika ee Soomaaliya (AUSSOM), oo beddelay hawlgalkii ATMIS 1-da January 2025.

Ku biiritaanka Soomaaliya ee PSC waxay Muqdisho siinaysaa madal toos ah oo ay ku saameyn karto siyaasadaha qaaradda ee la xiriira la-dagaallanka kooxaha ka dagaallama iyo xasilloonida gobolka, xilli uu socdo marxaladda ugu dambeysa ee wareejinta mas’uuliyadda amniga.

Goluhu wuxuu sidoo kale dib u doortay Côte d’Ivoire, Jamhuuriyadda Dimuqraadiga ah ee Congo, Sierra Leone, iyo Uganda.

Golaha ayaa mas’uul ka ah diblomaasiyadda ka hortagga khilaafaadka iyo maaraynta colaadaha qaaradda, isagoo leh awood uu ku oggolaan karo hawlgallada nabad ilaalinta isla markaana ku soo rogi karto cunaqabateyn marka ay dhacaan isbeddelo dastuuri ah oo aan sharci ahayn.