Soomaaliya oo guddi u magacawday dib-u-eegista manhajka qaranka

Muqdisho (Dawan) – Dowladda Soomaaliya ayaa magacaawday guddi dib-u-eegis ku sameeya manhajka qaranka, si loo fuliyo talooyinkii ka soo baxay shirweyne qaran oo ku saabsan waxbarashada, sida ay sheegtay Wasaaradda Waxbarashada, Hiddaha iyo Tacliinta Sare Arbacadii.

Guddigan oo ka kooban 15 xubnood, waxaa guddoomiye u ah Maxamed Cabdulqaadir Nuur, halka Cabdullahi Axmed Bariise loo magacaabay guddoomiye ku-xigeen, sida lagu sheegay bayaan ka soo baxay wasaaradda.

Daa’uud Maxamed Makaraan ayaa isna loo xilsaaray inuu noqdo xoghayaha guddiga, sida bayaanka lagu sheegay.

"Wasaaradda Waxbarashada, Hiddaha iyo Tacliinta Sare ee Jamhuuriyadda Federaalka Soomaaliya waxa ay si rasmi ah u shaacinaysaa magacaabista Guddiga Dibu’eegista Manhajka Qaranka, si loo fuliyo talooyinkii ka soo baxay Shirweynaha Qaran ee Dibu’eegista Waxbarashada (Febraayo 8–12, 2026)" ayaa lagu yiri war-saxaafdeedka Wasaaradda

Wasaaradda ayaa sheegtay in guddigan uu door muhiim ah ka qaadan doono dib-u-eegista iyo horumarinta manhajka waxbarashada dalka, gaar ahaan fasallada 1 ilaa 12.

Sida lagu sheegay bayaanka, guddigu wuxuu sidoo kale la shaqeyn doonaa heerarka kala duwan ee wasaaradaha waxbarashada ee federaalka iyo dowlad-goboleedyada, iyo bahwadaagta waxbarashada, si loo hagaajiyo tayada manhajka.

Sida wasaaradda ay sheegtay, magacaabistan ayaa ka dambeysay soo jeedintii Shirweynaha Qaran ee Dib-u-eegista Waxbarashada oo la qabtay 8–12 Febraayo 2026.