Muqdisho, 19 Febraayo 2026 (Dawan)- Dowladda Soomaaliya ayaa maanta oo Khamiis ah la wareegtay 11 gaari caafimaad oo wareega, kuwaas oo loogu talagalay in lagu xoojiyo caafimaadka xoolaha ee si weyn u saameeyay abaaraha iyo isbeddelka cimilada.
Gawaaridan ayaa ku qalabaysan agab caafimaad oo dhammaystiran iyo qaboojiyeyaal loogu talagalay tallaallada, waxaana lagu wareejiyay Wasaaradda Xoolaha, Dhirta iyo Daaqa intii ay socotay xaflad ka dhacday xarunta wasaaradda ee Muqdisho.
Mashruucan ayaa qayb ka ah qorshaha “Dhisidda Adkeysiga Sugnaanta Cunnada iyo Nafaqada ee Geeska Afrika” (BREFONS), waxaana gawaaridan loogu talagalay in ay gaaraan gobollada fogfog ee dalka, halkaas oo adeegyada caafimaadka xoolaha ay aad u yar yihiin.
Gawaaridan ayaa awood u siin doonta Soomaaliya in si degdeg ah loogu jawaabo cudurrada dillaaca, laguna fuliyo ololayaasha tallaalka, iyadoo qaboojiyeyaasha saaran ay ilaalinayaan waxtarka daawooyinka xitaa marka lagu jiro cimilada kulul ee dalka.
