Soomaaliya oo heshiis difaac la saxiixatay Sacuudiga

Riyaad, 9 Febraayo 2026 (Dawan) – Wasaaradda Gaashaandhigga Federaalka Soomaaliya iyo Wasaaradda Gaashaandhigga Boqortooyada Sacuudi Carabiya ayaa kala saxiixday heshiis is-afgarad (MoU) oo lagu xoojinayo iskaashiga dhinaca militariga.

Heshiiskan, waxaa qalinka ku duugay Wasiirka Gaashaandhigga Xukuumadda Federaalka Soomaaliya, Axmed Macallin Fiqi, iyo Wasiirka Gaashaandhigga Boqortooyada Sacuudi Carabiya, Amiir Khaalid Bin Salmaan,inti lagu guda jiray Bandhigga Difaaca Adduunka ee 2026, kaas oo Axaddii ka furmay magaalada Riyaad ee dalka Sacuudi Carabiya.

Bayaanka ka soo baxay Wasaaradda Gaashaandhigga Soomaaliya ayaa lagu yiri "Heshiiskan waxa uu sii xoojinayaa iskaashiga dhinacyada difaaca iyo milateriga ee labada dal, isla markaana waxa uu daboolayaa dhinacyo kala duwan oo ay labada dal si wadajir ah u danaynayaan"

Heshiiskan ayaa sidoo kale imaanaya iyadoo Soomaaliya ay dhawaan baabi’isay heshiisyo difaac iyo amni oo ay kula jirtay Imaaraadka Carabta, isla markaana ay heshiis difaac la saxiixatay dowladda Qatar, kaas oo lagu horumarinayo iskaashiga difaaca iyo tayada Ciidamada Xoogga Dalka Soomaaliyeed.