Azerbaijan (Dawan) – Dowladda Federaalka Soomaaliya ayaa Bangiga Horumarinta Islaamka (IsDB) la saxiixatay heshiis iskaashi oo lagu maalgelinayo mashaariic horumarineed oo qiimahoodu gaarayo $45 milyan, kaas oo hagaya iskaashiga labada dhinac muddada u dhexeysa 2026 illaa 2028.
Sida ay sheegtay Wasaaradda Maaliyadda Soomaaliya, heshiiska oo loo yaqaan Qaab-dhismeedka Iskaashiga Dalka waxaa magaalada Baku si rasmi ah ugu kala saxiixday Wasiirka Maaliyadda Dowladda Federaalka Soomaaliya, Biixi Iimaan Cige, iyo Madaxweynaha Bangiga Horumarinta Islaamka, Dr. Muhammad Al Jasser, intii lagu guda jiray shirka sanadlaha ah ee Kooxda Bangiga Horumarinta Islaamka.
Wasaaradda ayaa sheegtay in heshiiskan uu waafaqsan yahay Qorshaha Horumarinta Qaranka, isla markaana uu muujinayo sida Bangiga Horumarinta Islaamka uga go'an tahay taageeridda mudnaanta horumarineed ee Soomaaliya iyo kobaca dhaqaalaheeda.
