Mogadishu (Dawan) – Dowladda Federaalka Soomaaliya ayaa maanta oo Sabti ah magaalada Muqdisho ku saxiixday heshiis iskaashi oo ay la gashay Xarunta Ilaalinta Rayidka ee Xilliyada Colaadaha (CIVIC), kaas oo ujeedkiisu yahay in la xoojiyo badbaadada dadka rayidka ah inta lagu guda jiro hawlgallada ciidamada, sida ay sheegtay Wasaaradda Gaashaandhigga.
Heshiiskan ayaa waxaa kala saxiixday Wasiirka Gaashaandhigga Xukuumadda Federaalka Soomaaliya, Axmed Macallin Fiqi, iyo Agaasimaha CIVIC ee qaaradda Afrika, Vianney Bisimwa.
Sida ay sheegtay Wasaaradda Gaashaandhigga, qodobada heshiiska ayaa diiradda saaraya kordhinta iskaashiga ku aaddan yaraynta khasaaraha dadka rayidka ah ka soo gaara iska horimaadyada hubaysan, iyo dhiirrigelinta habraacyo waafaqsan shuruucda dalka iyo xeerarka caalamiga ah ee bani’aadantinimada.
Heshiiskan ayaa sidoo kale taageeraya hirgelinta Siyaasadda Qaranka ee Badbaadada Rayidka ee xilliyada colaadaha. Wasaaraddu waxay xustay in tallaabadani ay Soomaaliya ka dhigeyso dalkii ugu horreeyay ee Afrika ah oo hirgeliya siyaasadda noocan ah.