Soomaaliya oo ka digaysa roob-yaraan xilliga Gu’ga 2026

Muqdisho (Dawan) – Caasimadda Soomaaliya ee Muqdisho ayaa maanta martigelisay Madasha Qaranka ee Saadaasha Cimilada xilliga roobaadyada Gu’ga 2026, iyadoo mas’uuliyiintu ka digeen in roobabka dalka intiisa badan laga filayo ay ka hooseeyaan celceliskii caadiga ahaa, taasoo halis ku ah sugnaanta cunnada, xoolaha, iyo dadka.

Madashan, oo ay soo qabanqaabisay Wasaaradda Deegaanka iyo Isbeddelka Cimilada, ayaa dib u eegis ku samaysay saadaasha xilliyeedka bilaha Maarso ilaa May , iyo sidoo kale xaaladaha cimilada ee dhowaan jiray iyo saameynta abaarta taagan.

Khabiirrada cimilada ayaa sheegay in roobabka xilliga Gu’ga ee soo socda guud ahaan ay yaraan doonaan inta badan gobollada dalka, inkastoo gobollada koonfureed laga yaabo inay helaan roob ka badan marka la barbar dhigo gobollada waqooyi iyo bari.

“Muqdisho iyo guud ahaan dalka, roobabka la filayo way ka hooseyn doonaan celceliska,” ayuu yiri Iskuduwaha Saadaasha Cimilada Qaranka, Cabdirashiid Nuur, isaga oo raaciyay “Si kastaba ha ahaatee, koonfurta Soomaaliya waxaa laga yaabaa inay hesho roob ka wanaagsan kan waqooyiga iyo bariga.”

Madashan waxaa taageeraya hay’ado caalami ah oo ay ka mid yihiin Hay’adda Cimilada Adduunka (WMO) iyo Hay’adda Cunnada iyo Beeraha ee Qaramada Midoobay (FAO).

Ujeeddooyinka Madasha

Mas’uuliyiintu waxay sheegeen in madashu ay diiradda saarayso:

Dib u eegista xaaladaha cimilada ee dhowaan jiray iyo saameynta abaaraha socda,

Soo bandhigidda iyo ka doodista saadaasha qaran ee xilliga Gu’ga 2026,

Soo saarista bayaan rasmi ah oo lagu hago diyaargarowga iyo qorsheynta.

Soomaaliya ayaa la tacaalaysay roob-yaraan soo noqnoqotay xilliyaadii u dambeeyay, taasoo ku qasabtay bulshooyin xoolo-dhaqato ah inay xoolahooda u kaxeeyaan dalalka dariska ah si ay u raadsadaan biyo iyo daaq.

“Marka kaliya ee dadka Soomaaliyeed ay xoolahooda dalka kala baxaan oo dal kale u gudbaan waa marka abaartu ay aad u adkaato, daaqu yaryahay, roobkuna uusan di’in,” ayuu yiri Mawliid Cabdullaahi, Madaxa Calafka Xoolaha ee Wasaaradda Xannaanada Xoolaha. isaga oo raaciyay “Taasi waa sababta ay hadda dadku daaq uga raadinayaan xoolahooda.”

Saameyn Bani’aadamnimo oo Sii Kordhaysa

Soomaaliya waxay si joogto ah ula kulantaa abaaro iyo fatahaado, iyadoo khubaro ay sheegayaan in digniinaha hore ee cimilada marar badan aan si dhab ah loo qaadan, taasoo sii xoojisa saameynta bani’aadamnimo.

Warbixin dhawaan ay soo saartay Wasaaradda Qorsheynta Soomaaliya ayaa lagu sheegay in roob-yaraantu ay saameysay in ka badan 74 degmo oo ku kala yaalla dalka, iyadoo waxyeello gaartay qiyaastii 4.8 milyan oo qof iyo in ka badan laba milyan oo neef oo xoolo ah. Sidoo kale, in ka badan 200,000 oo qof ayaa ku barakacay biyo, cunto, iyo daaq la’aan, taasoo halis toos ah ku ah nolosha dadka iyo sugnaanta cunnada.

Mas’uuliyiinta ayaa sheegay in Madasha Saadaasha Cimilada ay maalinta berrito ah soo saari doonto bayaan rasmi ah oo ku saabsan saadaasha xilliyeedka Gu’ga, kaas oo tilmaami doona khataraha jira iyo talooyinka la xiriira diyaargarowga.