Al-jeeriya (Dawan) – Soomaaliya iyo Al-jeeriyaayaa ka wada hadlay iskaashi ku saabsan aqoonsiga qaranka, diiwaangelinta muwaadiniinta iyo soo saarista dukumentiyada amniga sare leh, kaddib booqasho uu Wasiirka Arrimaha Gudaha, Federaalka iyo Dib-u-heshiisiinta Soomaaliya, Cali Yuusuf Cali Xoosh, ku tagay Xarunta Qaranka ee Dukumentiyada iyo Aqoonsiyada Amniga Sare leh ee dalkaas.
Wasiir Xoosh, oo booqasho laba maalmood ah ku jooga Aljeeriya, ayaa halkaas kula kulmay mas’uuliyiinta hay’adda, iyadoo wafdigiisa uu qeyb ka ahaa Safiirka Soomaaliya u fadhiya Algeria, Danjire Yuusuf Axmed Xasan Jeego.
Xarunta ay booqdeen wafdiga Soomaaliya ayaa ah hay’ad dowladeed oo ka shaqeysa soo saarista iyo ilaalinta dukumentiyada rasmiga ah ee muwaadiniinta , sida baasaboorrada biometric-ka, kaararka aqoonsiga qaranka, laysanka darawalnimada iyo dukumentiyo kale oo amni sare leh.
Mas’uuliyiinta Al-jeeriya ayaa wafdiga Soomaaliya u soo bandhigay qaabka ay xaruntu u shaqeyso, tiknoolajiyada ay adeegsato iyo doorka ay ku leedahay ka hortagga been-abuurka dukumentiyada iyo xatooyada aqoonsiga. Waxaa sidoo kale la sharxay sida nidaamkan casriga ah u taageero adeegyada dowladda, maamulka xogta muwaadiniinta iyo fududeynta helitaanka dukumentiyada muhiimka ah.
