Qaahira (Dawan)- Soomaaliya ayaa ka qayb gashay Shirka 73aad ee Guddiga Gobolka Bariga Mediterranean-ka ee Hay’adda Caafimaadka Adduunka (WHO), oo ka furmay magaalada Qaahira ee dalka Masar, iyadoo ajandaha shirka ay ka mid yihiin xoojinta nidaamyada caafimaadka iyo ka jawaabista xaaladaha degdegga ah. Wasiirka Caafimaadka iyo Daryeelka Bulshada Soomaaliya, Dr. Cali Xaaji Aadam, ayaa hoggaaminaya wafdiga dowladda federaalka ee ka qaybgalaya shirka, oo soconaya 13–15 Oktoobar 2026.
Munaasabadda furitaanka waxaa wasiirka ku wehliyay Safiirka Soomaaliya u fadhiya Masar, Maxamed Cabdi Awaare, iyo agaasimayaal waaxeedyo ka tirsan Wasaaradda Caafimaadka.
Shirka waxaa ka qaybgalaya wasiirrada caafimaadka dalalka gobolka, madaxda WHO iyo wakiillo ka socda hay’adaha caalamiga ah. Doodaha ayaa diiradda lagu saarayaa ka hortagga cudurrada, horumarinta adeegyada caafimaadka iyo xoojinta iskaashiga gobolka.
