Soomaaliya oo kaalinta 1-aad ka gashay dib-u-habeynta Nidaaminta Isgaarsiinta iyo Tiknoolajiyadda

Muqdisho (Dawan) – Soomaaliya ayaa sameysay horumarkii ugu weynaa ee caalamka dhinaca dib-u-habeynta nidaaminta Tiknoolajiyadda Macluumaadka iyo Isgaarsiinta (ICT) intii u dhexeysay 2007 ilaa 2024, sida lagu sheegay warbixin cusub oo uu soo saaray Midowga Isgaarsiinta Caalamiga ah (ITU)

Warbixinta ITU ee Raad-raaca Nidaaminta ICT (ICT Regulatory Tracker) 2026 ayaa muujisay in dhibcaha Soomaaliya ay ka kordheen 0.0 sanadkii 2007 ilaa 77.5 sanadkii 2024, taasoo ka dhigan koror dhan 77.5 dhibcood.

Warbixintu waxay Soomaaliya gelisay kaalinta koowaad ee 15-ka dal ee sameeyay horumarka ugu weyn ee nidaaminta ICT-da, iyadoo ka hormartay dalal ay ka mid yihiin Comoros, Solomon Islands iyo Eswatini.

ITU ayaa sheegay in horumarkani uu yimid kadib dib-u-habeyn lagu sameeyay nidaamka isgaarsiinta Soomaaliya tan iyo markii la aas-aasay Hay’adda Isgaarsiinta Qaranka sanadkii 2018, iyadoo lagu dhisay Sharciga Isgaarsiinta Qaranka.

Warbixintu waxay sidoo kale sheegtay in Soomaaliya ay si rasmi ah ugu gudubtay heerka Jiilka Saddexaad (G3) ee nidaaminta ICT, kaas oo diiradda saaraya dhiirrigelinta maalgashiga iyo ballaarinta adeegyada isgaarsiinta.

Maareeyaha Guud ee Hay’adda Isgaarsiinta Qaranka, Mustafa Yaasiin Sheekh, ayaa sheegay in aqoonsigan uu ka tarjumayo dadaalladii dalka ee tan iyo 2018 lagu dhisayo hannaan sharciyeed casri ah oo hagaya suuqa isgaarsiinta.

Wuxuu sheegay in mudnaanta hadda ay tahay xoojinta tartanka suuqa, ballaarinta adeegyada iyo ilaalinta xuquuqda macaamiisha.

Soomaaliya ayaa leh mid ka mid ah suuqyada isgaarsiinta ee ugu kobaca badan Geeska Afrika, iyadoo adeegyada lacagaha mobilada, internet-ka iyo teknoolojiyadda maaliyadeed ee dhijitaalka ah ay si weyn u kordheen sanadihii u dambeeyay.

Dowladda Federaalka iyo Hay’adda Isgaarsiinta Qaranka ayaa sheegay inay sii wadi doonaan dib-u-habeynta sharciyeed iyo ballaarinta adeegyada dhijitaalka ah si loo taageero koboca dhaqaalaha iyo adeegyada dowladda.