Muqdisho (Dawan)- Dowladda Soomaaliya ayaa Isniintii ku dhawaaqday qabashada Carwada Dalxiiska iyo Maalgashiga Soomaaliya 2026, oo qeyb ka noqonaysa munaasabadaha lagu xusayo Maalinta Dalxiiska Adduunka ee 27-ka Sebteembar.
Wasiirka Warfaafinta, Dhaqanka iyo Dalxiiska, Cabdifataax Qaasim Maxamuud, ayaa sheegay in carwada lagu soo bandhigi doono goobaha dalxiiska, quruxda dabiiciga ah, hiddaha iyo dhaqanka dalka iyo fursadaha maalgashi ee ka jira waaxda.
Carwada ayaa la filayaa inay kulmiso hay’adaha dowladda, ganacsatada, maalgashadayaasha, shirkadaha dalxiiska, hoteellada, adeeg-bixiyayaasha, hal-abuurayaasha iyo ururrada bulshada.
Dowladdu waxay sheegtay in munaasabadda looga gol leeyahay in lagu abuuro iskaashi cusub, lagu dhiirrigeliyo maalgashiga, laguna xiro ganacsatada iyo dhinacyada ka shaqeeya horumarinta dalxiiska.
