Soomaaliya oo loo ogolaaday daabacaadda Baasaboorka Ururka Bulshada Bariga Afrika

Soomaaliya, 17 Febraayo 2026 (Dawan)– Dowladda Soomaaliya ayaa heshay ogolaansho rasmi ah oo ay ku daabici karto baasaboorka Ururka Bulshada Bariga Afrika (EAC), sida uu shaaciyey Wakiilka Joogtada ah ee Soomaaliya ee EAC, Danjire Ilyaas Cali Xasan, maanta oo Talaado ah.

Go’aankan ayaa Safiirka Soomaaliya u fadhiya Tanzania iyo Wakiilka Joogtada ah ee Soomaaliya ee EAC, Ilyaas Cali Xasan, u gudbiyey Wasiirka Amniga Gudaha ee Soomaaliya, Cabdullaahi Sheekh Ismaaciil “Fartaag,” iyo Agaasimaha Guud ee Hay’adda Socdaalka iyo Jinsiyadaha, Mustafa Sheekh Axmed Dhuxulow.

Ogolaanshahan ayaa Soomaaliya siinaya awoodda ay si rasmi ah u daabacdo oo u bixiso baasaboorka EAC, kaasoo bilaabmay bishii December 2025, waxaana la filayaa inuu fududeeyo isu socodka muwaadiniinta Soomaaliyeed gudaha Ururka Bulshada Bariga Afrika.

“Arrintani waxay Dowladda Soomaaliya u tahay horumar diblomaasiyadeed oo muhiim ah, isla markaana xoojinaysa isdhexgalka gobolka iyo fududeynta isu socodka muwaadiniinta EAC,” ayuu yiri Safiir Ilyaas Cali Xasan.

Tallaabadan Soomaaliya ee ku biirista nidaamka baasaboorka EAC waxaa loo arkaa guul diblomaasiyadeed oo muhiim ah, waxaana qeyb ka ah dadaallada ballaaran ee dalka ku xoojinayo xiriirka deriska iyo ku dhex-dhawaanshaha qaab-dhismeedka gobolka.