Muqdisho (Dawan)– Dowladda Soomaaliya ayaa heshiis la gaartay Pakistan oo ay kaga iibsaneyso diyaaradaha dagaalka ee JF-17 Thunder, taas oo qayb ka ah dadaallada dib loogu dhisayo laguna casriyeynayo Ciidanka Cirka Soomaaliya, sida ay sheegtay warbaahinta Turkiga ee TRHaber, inkastoo labada dowladood midkoodna uusan weli si rasmi ah u xaqiijin heshiis kama dambeys ah oo ku saabsan iibsiga diyaaradaha.
Warbixinta oo Warbaahinta TRHaber ay ku ku shaciyey barta X lagu sheegin tirada diyaaradaha uu heshiisku ku saabsan yahay, qiimaha heshiiska iyo xilliga la filayo in diyaaradaha la keeno.
Warkan ayaa kusoo beegmaya toddobaadyo kaddib markii wafdi sare oo ka socday Ciidanka Cirka Pakistan uu booqday Muqdisho, halkaas oo ay wada-hadallo kaga yeesheen dib-u-dhiska Ciidanka Cirka Soomaaliya iyo xoojinta iskaashiga difaaca cirka ee labada dal.
Wafdiga waxaa hoggaaminayay Air Marshal Muhammad Sarfraz, oo ah Taliyaha Difaaca Cirka Pakistan iyo Ku-xigeenka Taliyaha Ciidanka Cirka, kaas oo kulamo la yeeshay madaxda sare ee Soomaaliya oo ay ka mid yihiin Madaxweyne Xasan Sheekh Maxamuud, Ra’iisul Wasaare Xamse Cabdi Barre iyo Wasiirka Gaashaandhigga Axmed Macallin Fiqi.
Sarfraz ayaa sidoo kale xarunta Ciidanka Cirka Soomaaliya kula kulmay Taliyaha Ciidanka Cirka Soomaaliya, Sarreeye Guuto Cabdirisaaq Maxamuud Xaaji, iyadoo wada-hadalladu diiradda saareen tababarka, horumarinta hay’adaha, xirfadaha gaarka ah iyo awoodaha ay Soomaaliya u baahan tahay si dib loogu dhiso ciidankeeda cirka.
Intii lagu jiray booqashada, Sarfraz ayaa Taliyaha Ciidanka Cirka Soomaaliya guddoonsiiyay moodelka diyaaradda JF-17 Thunder, sida laga soo bandhigay kulanka. Labada dhinac midkoodna xilligaas ma shaacin heshiis ku saabsan iibsiga diyaaradaha.
