Muqdisho (Dawan) — Soomaaliya ayaa Muqdisho ka furtay shir saddex maalmood soconaya oo ay isugu yimaadeen hoggaamiyeyaal ka socda qurbo-joogta iyo mas’uuliyiin dowladda federaalka ah, si loo dejiyo hannaan lagu xoojinayo kaalinta Soomaalida dibadda ku nool ay ka qaadanayaan horumarinta dalka.
Shirka Hoggaamiyeyaasha Qurbo-joogta Soomaaliyeed ayaa maanta oo Axad ah ka furmay Muqdisho, waxaana ka qeybgalaya 30 xubnood oo matalaya qurbo-joogta Soomaaliyeed ee ku nool Yurub, Waqooyiga Ameerika, Bariga Dhexe iyo Afrika.
Wasiir ku-xigeenka Arrimaha Dibadda iyo Iskaashiga Caalamiga ah, Xasan Maxamed Cali “Nadaara”, ayaa si rasmi ah u furay shirka, oo uu qabanqaabiyay Xafiiska Ra’iisul Wasaaraha, isaga oo kaashanaya Waaxda Arrimaha Qurbo-joogta ee Wasaaradda Arrimaha Dibadda iyo Iskaashiga Caalamiga ah. Waxaa sidoo kale ka qeybgalay Xoghayaha Joogtada ah ee Wasaaradda, Xamsa Aadan Haadow.
Qodobka ugu weyn ee shirka ayaa ah diyaarinta Qorshaha Ka-qeybgalka Qurbo-joogta, kaas oo lagu doonayo in la sameeyo hannaan mideysan oo khibradda, xiriirrada xirfadeed iyo awoodda maalgashi ee Soomaalida dibadda ku nool loogu xiriirinayo mudnaanta horumarineed ee dalka.
Qorshahan ayaa la jaanqaadi doona Qorshaha Isbeddelka Qaranka 2025–2029, oo ah qorshaha dowladda ee lagu hagayo horumarinta dhaqaalaha, dib-u-habeynta hay’adaha iyo tayeynta adeegyada bulshada.
