Soomaaliya oo qorsheyneysa dhismaha Naadiga Dabaasha

Qorshahan ayaa lagu shaaciyay kulan dhex maray Wasiirka Dhallinyarada iyo Ciyaaraha iyo Safiirka Türkiye, oo diiradda lagu saaray iskaashiga iyo horumarinta ciyaaraha.

May 20, 2026

2 daqiiqo akhris

Waxaa qoray Cabdullaahi Salaad - Reporter

Muqdisho (Dawan) – Soomaaliya ayaa qorsheyneysa in la dhiso Naadiga Dabaasha ee dalka, xilli Wasaaradda Dhallinyarada iyo Ciyaaraha ay sheegtay inay xoogga saareyso horumarinta ciyaaraha iyo awood-siinta dhallinyarada.

Qorshahan ayaa lagu soo bandhigay kulan uu Wasiirka Dhallinyarada iyo Ciyaaraha Soomaaliya, Maxamed Cabdulqaadir Cali, xarunta cusub ee Wasaaradda kula yeeshay Safiirka Jamhuuriyadda Türkiye u fadhiya Soomaaliya, Alper Aktaş.

Kulanka ayaa diiradda lagu saaray xoojinta iskaashiga Soomaaliya iyo Türkiye ee dhinacyada dhallinyarada, ciyaaraha iyo kobcinta hay’adaha.

Wasiirka ayaa la wadaagay Safiirka qorshayaasha Wasaaradda ee lagu aas-aasayo Naadiga Dabaasha Soomaaliya oo heer qaran ah, si loo ballaariyo ka qaybgalka dhallinyarada ee dabaasha loona xoojiyo horumarinta ciyaaraha dabaasha ee Soomaaliya.

Maqaallo la xidhiidha

3 saac kahor

Maxay Hormuud Telecom ka tiri ilaalinta xogta muwaadiniinta?

5 saac kahor

Maxay tahay ujeedada booqashada Kusimaha Safiirka Mareykanka ee Puntland?

Wasiirka ayaa sidoo kale sheegay in maalgelinta dhallinyarada ay ka mid tahay mudnaanta istiraatiijiga ah ee dalka, isagoo ku tilmaamay dhallinyarada hantida ugu weyn ee Soomaaliya iyo aas-aaska horumar waara iyo xasillooni.

Waxaa kale oo uu Wasiirku Safiirka la wadaagay dadaallada socda ee lagu taageerayo xulalka Soomaaliya ee da’doodu ka yar tahay 17 sano, si ay uga qeybgalaan tartamada heer gobol, xilli lagu xasuusto in ciyaartoyda da’doodu ka yar 17 sano ay ku guuleysteen koobkoodii ugu horreeyay sanadkii 2022.

Safiirka Türkiye, Alper Aktaş, ayaa bogaadiyay xarunta cusub ee Wasaaradda, isagoo ammaanay horumarka hay’adeed ee lagu gaaray hoggaanka Wasiirka. Wuxuu sheegay in hirgelinta xaruntan ay muujineyso ballan-qaad hore oo loo beddelay ficil muuqda.

Kulanka ayaa muujiyay in Soomaaliya iyo Türkiye ay doonayaan inay sii ballaariyaan iskaashiga dhinacyada horumarinta dhallinyarada, sare u qaadista tayada ciyaaraha iyo dhismaha awoodda hay’adaha dowladda.