Brasil, 8 Nofeembar 2025 — Dowladda Federaalka Soomaaliya ayaa soo bandhigtay Qorshaha Qaranka ee La-qabsiga Cimilada (NAP) oo qiimihiisu yahay $6.3 bilyan, iyada oo ugu baaqday bulshada caalamka in maalgelinta la xiriirta cimilada loo arko “caddaalad, balse aan loo arkin deeq.”
Baaqan ayaa waxaa jeediyay Ra’iisul Wasaare Ku-xigeenka Soomaaliya, Saalax Axmed Jaamac Jimcihii, intii lagu guda jiray shirweynaha isbeddelka cimilada ee ka socda magaalada Belém, Brazil.
Saalax Jaamac ayaa faahfaahiyay istaraatiijiyad ballaaran oo lagu xakameynayo saameynta abaarta, fatahaadaha, iyo cunto-yarida — kuwaas oo weli saameynaya malaayiin qof, inkasta oo Soomaaliya ay ka qayb qaadato wax ka yar 0.019% ee qiiqa caalamka ee keena isbeddelka cimilada. Soomaaliya ayaa haatan ka mid ah dalalka ugu nugul cimilada aduunka.
“Dhibaatada cimilada ee Soomaalida ma aha berri — waa maanta, waana mid dhab ah,” ayuu yiri, isagoo xusay in hooyooyin ay socdaal dheer u maraan biyo, xoolo-dhaqato badanna ay waayaan xoolahoodii, halka carruurtuna ay ku dhibtoonayaan gaajo iyo barakac.
Qorshahan $6.3 bilyan ah ayuu sheegay in uu diiradda saarayo dhisidda adkaysi iyo horumar waara iyada oo la adeegsanayo nidaamyada digniinta hore, beeraha casriga ah ee cimilada u adkaysta, adeegyo caafimaad adkaysi leh, iyo kaabayaal cimilada u adkaysan kara. Waxa kale oo qorshaha xoogga lagu saarayaa doorka haweenka iyo dhalinyarada ee la tacaalidda saameynta isbeddelka cimilada.
Saalax ayaa xusay in maalgelinta cimilada ee caalamka ay tahay mid si weyn u sinnaan la’. Inkasta oo la diiwaangeliyay $1.5 tirilyan oo maalgelin cimiladeed sanadkii 2022, haddana dalalka nugul iyo kuwa ay colaadaha saameeyeen kama helin wax ka badan 5% ayuu yiri. Soomaaliya, sanadkii 2020, waxay heshay kaliya $300 milyan, taas oo ah wax ka yar 1% baahida dhabta ah.
