Soomaaliya oo Sacuudiga ka doonaysa maalgashi Koronto.

Soomaaliya, 30 Nov. 25 (Dawan) – Wasiirka Maaliyadda Soomaaliya Biixi Iimaan Cige ayaa sheegay in Dowladda ay wado qorshe Boqortooyada Sacuudi Carabiya ay maalgelin ugu sameyneyso Korontada Soomaaliya, wadahadalka arintaasna uu bilowday.

“Safarki ugu danbeeyay ee Sacuudiga waxyaabahii ugu waaweyn ee aan kala hadleynay waxaa ka mid ah ahaa maalgashiga korontada,” ayuu yiri Biixi Iimaan Cige

Wasiirka ayaa hadalkaan ka sheegay xilli uu marti ku ahaa Miizaan portcast oo ay Warbaahinta Dawan baahiso, isagoo ka dhawaajiyay in qorshaha dowladda uu yahay in hoos loo dhigo qiimaha korontada dhamaadka sanadka soo socda ee 2026 ugu yaraan 50%.

Biixi ayaa sidoo kale sheegay maalgelinta hadda ee koronta lagu sameynayo aysan ku filneen baahidana ay intaas ka badan tahay, taasna ay keentay in ay raadiyaan maalgelin dheeri ah oo lagu sameeyo korontada.

Sida uu sheegay wasiirka sababaha ugu badan ee keena in ganacsiyada qaar ay burburaan ay tahay qiimaha korontada dalka uu qaali yahay, iyaga oo taas ka duulayana ay wadaan in qiimaha hoos loo dhigo inta ay awoodaan.

Sacuudiga iyo Soomaaliya ayaa ku heshiiyay mashaariic dhowr ah oo ku saabsan horumarinta, sida dhismaha iyo dayactirka Garoomada ciyaaraha, iyo mid kale oo ku saabsan ceelal bilyood si loo helo biya nadiif.