Soomaaliya oo saxiixday heshiis la xiriira diiwaangelinta maraakiibta

Muqdisho (Dawan ) – Dowladda Federaalka Soomaaliya ayaa saxiixday heshiis is-afgarad (MoU) oo la xiriira dhisayo diiwaangelinta maraakiibta, iyadoo tallaabadan lagu doonayo in lagu xoojiyo maamulka badda iyo in kor loo qaado sumcadda calanka Soomaaliya ee caalamka.

Heshiiskan ayaa Axadii waxaa saxiixay Wasiirka Wasaaradda Dekedaha iyo Gaadiidka Badda ee Xukuumadda Federaalka Soomaaliya, Cabdulqaadir Maxamed Nuur, iyo Agaasimaha shirkadda Somali Ship Register Limited, Çağdaş Oykun Saltaş.

Sida lagu sheegay war ka soo baxay wasaaradda, heshiisku wuxuu diiradda saaraya dhismaha nidaam casri ah oo lagu diiwaangelinayo maraakiibta si ay u qaataan calanka Soomaaliya, taasoo ka qayb qaadan doonta dib-u-habaynta iyo horumarinta waaxda badda.

Wasiirka ayaa sheegay in heshiiskan uu abuuri doono fursado cusub oo dhinaca maalgelinta iyo shaqo abuurka, isla markaana uu sare u qaadi doono kalsoonida iyo sumcadda calanka Soomaaliyeed. Wuxuu intaas ku daray in Soomaaliya ay ka faa’iideysan doonto khibradda farsamo ee shirkadda lala heshiiyey.

“Heshiiskan wuxuu abuuri doonaa fursado cusub oo dhinaca maalgelinta, shaqo abuurka, iyo kor u qaadidda calanka Soomaaliyeed, annagoo ka faa’iideysanayna khibradda saaxiibka kale,” ayuu wasiirku yiri, qoraal uu soo dhigay bartiisa bulshada.

Dowladda Soomaaliya ayaa muddooyinkii dambe waday dadaallo lagu casriyeynayo nidaamka gaadiidka badda, iyadoo qorshahan cusub uu qayb ka yahay istaraatiijiyadda lagu horumarinayo dhaqaalaha buluugga ee dalka.