Venice (Dawan)– Taliyaha Ciidanka Badda Jamhuuriyadda Federaalka Soomaaliya, Jeneraal Cabdiwahaab Cabdullaahi Cumar, ayaa magaalada Venice ee Talyaaniga ku saxiixay laba heshiis oo muhiim u ah iskaashiga badaha, kuwaas oo Soomaaliya ku biirinaya laba shabakad oo caalami ah oo la xiriira maamulka iyo amniga gaadiidka badda, sida uu baahiyey Telefishinka Qaranka Soomaaliyeed.
Heshiisyada ayaa kala ah Xarunta Gobolka ee Maamulka Gaadiidka Badda ee Fogaan-aragga ah (V-RMTC) iyo Shabakadda Isku-xirka Gaadiidka Badda ee Gobollada Ka Tallaabisa (T-RMN), kuwaas oo ay ku mideysan yihiin dalal leh marinno badeed oo kala duwan. Ku biirista labada shabakad ayaa Soomaaliya u oggolaanaysa inay si rasmi ah uga mid noqoto iskaashiyada caalamiga ah ee la xiriira xog-wadaagga iyo dhaqdhaqaaqa gaadiidka badda.
Jeneraal Cabdiwahaab ayaa heshiisyada ku saxiixay magaalada Venice, xilli uu ka qeybgalayay shirweynaha 15-aad ee Awoodda Ciidamada Badda Adduunka, oo ay soo qabanqaabisay Taliska Ciidanka Badda Talyaaniga, laguna qabtay xarunta Arsenal ee Ciidamada Badda Talyaaniga.
Shirweynaha waxaa ka qeybgalay taliyeyaasha ciidamada badda ee dalal badan oo caalamka ah, iyadoo diiradda lagu saaray kor u qaadista amniga badaha, la socodka fiilooyinka mara badaha, horumarinta qalabka casriga ah ee ciidamada badda iyo xoojinta iskaashiga dalalka leh marin-badeedyo kala duwan.
Waxaa sidoo kale looga hadlay is-weydaarsiga macluumaadka maraakiibta iyo dhaqdhaqaaqa gaadiidka badda, iyo sidii loo xoojin lahaa iskaashiga istiraatiijiga ah ee caalamiga ah.