Soomaaliya oo sheegtay in AS ka badan 10 lagu dilay Shabeellaha Hoose

Muqdisho(Dawan) –Wasaaradda Gaashaandhigga Soomaaliya ayaa sheegtay in ciidanka kumaandooska Danab ay 14 ka tirsan Al-Shabaab ku dileen howlgal ka dhacay degmada Kurtunwaarey ee gobolka Shabeellaha Hoose.

Wasaaradda ayaa sheegtay in howlgalka lagu beegsaday goobo ay ku sugnaayeen, sida ay hadalka u dhigtay, horjoogayaal iyo dagaallamayaal ka tirsan Al-Shabaab.

Intii uu socday howlgalka, ciidamada dowladda ayaa sidoo kale burburiyay kayd hub, walxaha qarxa iyo agab kale oo ay wasaaraddu sheegtay in kooxdaasi ay u adeegsan jirtay diyaarinta iyo fulinta weerarro ka dhan ah shacabka.

Wasaaraddu faahfaahin dheeraad ah kama bixin waqtiga rasmiga ah ee uu howlgalka dhacay balse waxay sheegtay in howlgalku uu qeyb ka yahay dadaallada joogtada ah ee Ciidanka Xoogga Dalka Soomaaliyeed ay ku doonayaan in Al-Shabaab looga saaro deegaannada ay weli kaga sugan yihiin dalka.

Wasaaradda Gaashaandhigga iyo Taliska Ciidanka Xoogga Dalka Soomaaliyeed ayaa xaqiijiyay in ay sii wadi doonaan howlgallada lagu xaqiijinayo amniga iyo xasilloonida guud ee dalka.