Soomaaliya oo sheegtay in la dilay maskaxdii ka dambeysay weerarkii Godka Jilacow

Soomaaliya, 2 Maarso 2026 (Dawan)– Hay’adda Sirdoonka iyo Nabadsugidda Qaranka (NISA) ayaa caawa oo Isniin ah sheegtay inay dishay hoggaamiye sare oo ka tirsanaa Al-Shabaab, kaas oo lagu tilmaamay “maskaxdii” ka dambeysay dhowr weerar oo argagixiso oo ka dhacay caasimadda, oo uu ku jiro weerarkii weynaa ee 2025 lagu qaaday Godka Jilacow.

Bayaan ay hay’addu soo saartay ayay ku sheegtay in ninkaasi, oo loo yaqaanay magacyo ay ka mid yihiin Kamaaludiin Yuunis Maxamed iyo “Caraale,” lagu dilay howlgal qorsheysan oo habeenimo la fuliyay, iyadoo lala kaashaday saaxiibo caalami ah.

Howlgalka ayaa ka dhacay deegaanka Hantiwadaag oo u dhow magaalada Awdheegle ee gobolka Shabeellaha Hoose, oo ka mid ah meelaha ay ku badan yihiin maleeshiyaadka Al-Shabaab.

NISA waxay sheegtay in horjoogahan uu ahaa isku-duwihii ugu weynaa weerarkii 4-tii Oktoobar 2025 lagu qaaday Godka Jilacow, oo ah xarun dambi-baaris iyo xabsi ku taalla Muqdisho.

Sidoo kale, waxaa lala xiriiriyay qaraxyo ismiidaamin ah oo ka dhacay Akadeemiyada Milateriga ee Jaalle Siyaad bishii Luulyo 2025 iyo xerada tababarka Jeneraal Dhega-Badan bishii Diseembar 2025. “Howlgalkii xalay waxa uu ahaa mid loogu aargudayay dhiigga shacabka, saraakiisha iyo askarta ku naf waayay weerarradii argagixiso,” ayay tiri hay’addu, iyadoo intaas ku dartay in hoggaamiyahan la dabagalayay muddo ka badan 150 maalmood.

Ciidamada dowladda Soomaaliya, oo taageero ka helaya ciidamada Midowga Afrika iyo saaxiibo caalami ah—gaar ahaan Mareykanka oo inta badan fuliya weerarro loo adeegsado diyaaradaha aan duuliyaha lahayn—ayaa kordhiyay cadaadiska ay ku hayaan Al-Shabaab tan iyo sannadkii la soo dhaafay. Ilaa iyo hadda, ma jirto wax war ah oo ka soo baxay dhinaca Al-Shabaab oo ku saabsan dhimashada hoggaamiyahan.