Muqdisho (Dawan) – Hay’adda Socdaalka iyo Jinsiyadda Soomaaliya ayaa shaacisay in la soo afjaray dib-u-dhacyadii saameeyay bixinta baasaboorrada saddexdii bilood ee la soo dhaafay, isla markaana muwaadiniinta Soomaaliyeed hadda ay baasaboorkooda ku heli karaan muddo toddobaad gudihiis ah marka ay codsadaan.
Agaasimaha Guud ee Hay’adda Socdaalka iyo Jinsiyadda, Xuseen Qaasim Yuusuf, ayaa sheegay in hay’addu ay si buuxda u xallisay caqabadihii sababay dib-u-dhaca adeegga, isagoo xusay in adeegga baasaboorku dib ugu soo laabtay hannaankiisii caadiga ahaa.
Mas’uulku waxa uu raalli-gelin rasmi ah u diray dhammaan muwaadiniinta Soomaaliyeed ee uu saameeyay dib-u-dhacu, isaga oo qiray in hakadkaasi uu carqaladeeyay adeegyo muhiim u ahaa shacabka gudaha iyo dibadda dalka.
“Waxaan rabaa inaan cudurdaar rasmi ah u diro muwaadiniinta Soomaaliyeed meel kasta oo ay joogaan. Dib-u-dhacaas hadda waa la xalliyay,” ayuu yiri Agaasimaha Guud.
Xuseen ayaa sheegay in muwaadiniinta Soomaaliyeed, meel kasta oo ay dunida ka joogaan, ay hadda baasaboorkooda ku heli karaan muddo aan ka badnayn toddobaad laga bilaabo marka ay codsiga gudbiyaan.
