Beijing (Dawan)- Soomaaliya ayaa Shiinaha iyo dalalka Afrika kala hadashay xoojinta iskaashiga difaaca iyo amniga, sida ay Jimcahaan sheegtay Wasaaradda Gaashaandhigga Soomaaliya.
Wasiirka Gaashaandhigga Axmed Macallin Fiqi ayaa arrintan kaga hadlay Madasha Afaraad ee Nabadda iyo Amniga Shiinaha iyo Afrika, oo lagu qabtay Beijing, laguna martiqaaday wasiirrada difaaca, taliyeyaasha ciidamada iyo saraakiil sare.
Madasha sanadkan waxaa halkudhig looga dhigay “Wadajir u Dhisidda Amniga: Toddobaatan Sano oo Is-garab-taag ah iyo Wada-qaadista Mas’uuliyadda Xaaladaha Cusub.” Waxaa ka qaybgalay wakiillo militari iyo diblomaasiyadeed oo ka kala socday Midowga Afrika iyo 41 dal oo Afrikaan ah.
Wasaaradda Gaashaandhigga Soomaaliya ayaa sheegtay in Fiqi uu madasha ku soo bandhigay dadaallada dowladda ee la-dagaallanka Al-Shabaab, dib-u-dhiska hay’adaha qaranka iyo horumarinta ciidamada ammaanka.
