Muqdisho, 3 Janaayo 2026 (Dawan) – Agaasimaha Guud ee Wasaaradda Awqaafta iyo Arrimaha Islaamka, Ibraahim Nadaara, ayaa maanta shaaciyay shuruudo caafimaad oo cusub oo quseeya xujayda Soomaaliyeed ee Xajka 2026.
Shir jaraa’id oo uu qabtay Nadaara, ayaa lagu sheegay in dhammaan xujaydu ay tahay in caafimaadkooda la hubiyo ka hor inta aysan u safrin Xajjka, iyadoo loo hoggaansamayo shuruucda Wasaaradda Xajka ee Boqortooyada Sacuudiga. Xujayda waxaa laga baarayaa cudurrada faafa iyo kuwa halista ah, sida cudurrada beerka, xanuunada wadnaha, shaqada kilyaha, xaaladaha haweenka uurka leh ee lixda bilood ka badan, iyo dadka qaarkood ee qaata daawada kansarka.
Nadaara ayaa sidoo kale ku booriyay xujayda waayeelka ah inay la socdaan qof gacan ka geysan kara Xajjka, isagoo xusay in amarkaasi uu ka yimid dowladda Sacuudiga si loo hubiyo badqabka xaajiyada da’doodu wayn tahay.
