Muqdisho (Dawan) – Dowladda Federaalka Soomaaliya ayaa maata oo Khamiis ah daah-furtay siddeed buug oo tababarro beeraha ah, kuwaas oo loogu talagalay in lagu horumariyo aqoonta iyo xirfadaha beeraleyda Soomaaliyeed, isla markaana kor loogu qaado wax-soo-saarka dalagyada muhiimka u ah sugnaanta cuntada.
Wasiirka Wasaaradda Beeraha iyo Waraabka ee Xukuumadda Federaalka Soomaaliya, Maxamed Cabdi Xayir (Maareeye), ayaa si rasmi ah u daah-furay buugaagtan, isaga oo sheegay inay kaalin weyn ka qaadan doonaan xoojinta aqoonta beeraleyda, gaar ahaan dadka aan heli karin adeegyada internet-ka.
Buugaagtan oo markii ugu horreysay lagu diyaariyey Af-Soomaali ayaa beeraleyda iyo shaqaalaha fidinta beeraha siinaya hagitaan qaran oo mideysan oo ku saabsan hababka casriga ah ee beerashada iyo maaraynta dalagyada kala duwan.
Waxay diiradda saarayaan siddeed silsiladood oo dalagyo muhiim ah, kuwaas oo ay ka mid yihiin galleyda, masagada, bariiska, gabaldayaha, sisinta, lawska iyo dalagyo kale oo laf-dhabar u ah wax-soo-saarka beeraha Soomaaliya.