Soomaaliya, 3 Diseembar 2025 – Wasaaradda Waxbarashada Federaalka ayaa sheegay Talaadadii in kooxdii ugu horreysay ee arday Sudaani ah oo la siiyay deeq waxbarasho oo ay dowladda Soomaaliya bixisay ay dalka soo gaareen.
Wasiirka Waxbarashada, Farah Sheikh Abdulkadir, ayaa soo dhoweeyay ardayda, isaga oo xusay xiriirka taariikhiga ah ee labada dal ka dhexeeya.
“Joogiinna halkan waxay na xusuusinaysaa sannadihii ay Sudan soo dhoweyn jirtay kumannaan arday Soomaali ah. Ku soo dhowaada dalkiinna labaad, waxaana rajaynaynaa in aad halkaan ka heli doontaan garab iyo gacan walba oo aad u baahan tihiin,” ayuu yiri.
Ardaydan waxaa deeq waxbarasho siiyay dowladda Soomaaliya, waxana ay waxbarashadooda ku qaadan doonaan Jaamacadda Ummadda Soomaaliyeed.
Safiirka Sudan ee Soomaaliya, Cabdulraxmaan Khaliil Axmed oo hadal ka jeediyay kadib imaatinkooda, ayaa soo dhoweeyay hindisaha, isagoo uga mahadceliyay dowladda Soomaaliya martigelinta.
