Muqdisho (Dawan) – Wasaaradda Gaashaandhigga Soomaaliya ayaa soo dhoweysay go’aanka Qaramada Midoobay ee Ahlu Sunna Waljamaaca looga saaray liiska dhinacyada lagu eedeeyo askaraynta iyo adeegsiga carruurta ee colaadaha hubeysan, iyadoo ku tilmaantay tallaabo ka tarjumaysa horumarka laga sameeyay dib-u-habeynta amniga iyo ilaalinta carruurta.
Go’aanka ayaa lagu xusay warbixinta sannadlaha ah ee Xoghayaha Guud ee Qaramada Midoobay ee ku saabsan Carruurta iyo Colaadaha Hubeysan (A/80/723-S/2026/357), oo la soo saaray bishan Juun.
Sida lagu sheegay warbixinta, Ahlu Sunna Waljamaaca (ASWJ) waxaa liiska looga saaray qaab loogu yeeray "ka saarid farsamo", kadib markii kooxda aysan sii ahaan karin koox hubeysan oo madax-bannaan, isla markaana xubnaheeda si buuxda loogu daray hay’adaha amniga qaranka Soomaaliya.
Ahlu Sunna Waljamaaca waa dhaqdhaqaaq diimeed lahaa garab hubeysan, kuna xiran culimo iyo taageerayaal Suufi ah. Kooxdu waxay si weyn awood ugu leheed bartamaha Soomaaliya, gaar ahaan deegaannada Galmudug, iyadoo hub u qaadatay la dagaallanka Al-Shabaab.
ASWJ waxay ku jirtay liiska Qaramada Midoobay muddo ka badan 12 sano, waxaana markii ugu horreysay lagu daray warbixintii sannadlaha ahayd ee Xoghayaha Guud ee 2014, taas oo diiwaangelisay askaraynta iyo adeegsiga carruurta Soomaaliya intii lagu jiray sanadkii 2013, iyadoo qaar ka mid ah kiisaskaas loo tiiriyay kooxda.
