Muqdisho(Dawan) – Magaalada Muqdisho ayaa maanta martigelisay munaasabad lagu daahfuray eraybixinta amniga saybarka, taas oo qayb ka ah dadaallada lagu horumarinayo fahamka cilmiga tiknoolajiyada iyo amniga internetka ee bulshada Soomaaliyeed.
Mashruucan waxaa si wadajir ah u fulinaya Hay’adda Isgaarsiinta Qaranka (HIQ), Akademiya Goboleedka Af-Soomaaliga (AGA), iyo Akademiyada Cilmiga, Dhaqanka iyo Suugaanta Soomaaliyeed, kuwaas oo ujeeddadoodu tahay inay kobciyaan adeegsiga Af-Soomaaliga ee la xiriira cilmiga iyo tiknoolajiyada casriga ah.
Daahfurka mashruucan ayaa lagu soo bandhigay in ka badan 100 eray oo cusub oo la xiriira amniga saybarka, kuwaas oo lagu wado in lagu soo dhammaystiro wajiga koowaad ee eraybixinta muddo bil gudaheed ah. Mas’uuliyiinta mashruuca ayaa sidoo kale sheegay in qorshuhu yahay in mustaqbalka la diyaariyo qaamuus gaar ah oo ku saabsan tiknoolajiyada iyo amniga saybarka.
Khubaro iyo aqoonyahanno ka qeyb galay munaasabadda ayaa tilmaamay in bulshada Soomaaliyeed ay muddo dheer la tacaalaysay caqabadda ka dhalata maqnaanshaha ereyo Af-Soomaali ah oo u dhigma erayada cilmiyeysan ee la xiriira tiknoolajiyada. Waxay sheegeen in mashruucan uu ka jawaabayo baahidaas sii kordheysa.
